ಸುಮ್ಮನಿರದೇ ಇರುವೆಬಿಟ್ಟುಕೊಂಡರು ಎಂಬ ಮಾತೊಂದಿದೆ. ಅಂಥದ್ದೇ ಪ್ರಕರಣವೊಂದು ಪಂಜಾಬ್ನಲ್ಲಿ ನಡೆದಿದ್ದು, ಲಿವ್ ಇನ್ ರಿಲೇಷನ್ನಲ್ಲಿ ಇರುವ ಪ್ರೇಮಿಗಳು 50 ಸಾವಿರ ರೂಪಾಯಿ ದಂಡ ಹಾಕಿಸಿಕೊಂಡ ಘಟನೆ ನಡೆದಿದೆ.
ರೇಖಾ ಹಾಗೂ ಸಂತೋಷ್ (ಹೆಸರು ಬದಲಾಯಿಸಲಾಗಿದೆ) ಪ್ರೇಮಿಗಳ ಕಥೆ ಇದು. ಇವರಿಬ್ಬರೂ ಹೇಳಿಕೇಳಿ ವಿವಾಹಿತರು. ಅಂದರೆ ರೇಖಾಳಿಗೂ ಬೇರೆ ಮದುವೆಯಾಗಿದೆ, ಸಂತೋಷ್ಗೂ ಮದುವೆಯಾಗಿದೆ. ಆದರೆ ಇವರಿಬ್ಬರೂ ತಂತಮ್ಮ ಪತಿ-ಪತ್ನಿಗೆ ವಿಚ್ಛೇದನ ನೀಡದೆ ಒಟ್ಟಿಗೇ ಲಿವ್ ಇನ್ ಸಂಬಂಧದಲ್ಲಿ ನಾಲ್ಕೈದು ವರ್ಷಗಳಿಂದ ನೆಲೆಸಿದ್ದಾರೆ.
ಸುಮ್ಮನೇ ಒಟ್ಟಿಗೇ ಇದ್ದಿದ್ದರೆ ಪರವಾಗಿರಲಿಲ್ಲ. ಆದರೆ ಇವರಿಬ್ಬರೂ ತಂತಮ್ಮ ಸಂಗಾತಿ ವಿರುದ್ಧ ಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು. ರೇಖಾ ತನ್ನ ಗಂಡನ ವಿರುದ್ಧ ಹಾಗೂ ಸಂತೋಷ್ ತನ್ನ ಹೆಂಡತಿ ವಿರುದ್ಧ ದೌರ್ಜನ್ಯ ಕೇಸ್ ದಾಖಲು ಮಾಡಿದ್ದಾರೆ.
ಇದರ ವಿಚಾರಣೆ ವೇಳೆ ರೇಖಾ 2016ರಲ್ಲಿಯೇ ಗಂಡನನ್ನು ಬಿಟ್ಟು ಬಂದಿರುವ ವಿಷಯ ತಿಳಿದಿದೆ. ಇದಾದ ಮೇಲೆ ತನ್ನ ಪ್ರಿಯಕರನ ಜತೆ ಲಿವ್ ಇನ್ನಲ್ಲಿ ಇರುವ ಈಕೆ ಎರಡು ವರ್ಷ ಬಿಟ್ಟು ಗಂಡನ ವಿರುದ್ಧ ದೌರ್ಜನ್ಯದ ಅರ್ಜಿ ಸಲ್ಲಿಸಿದ್ದು ತಿಳಿದಿದೆ. ಅದೇ ರೀತಿ ಸಂತೋಷ್ ಕೂಡ ತನ್ನ ಪತ್ನಿಯನ್ನು ಬಿಟ್ಟು ರೇಖಾಳ ಜತೆ ನೆಲೆಸಿರುವುದು ಕೋರ್ಟ್ ಗಮನಕ್ಕೆ ಬಂದಿದೆ.
ವಿಚಿತ್ರ ಎಂದರೆ, ಇಬ್ಬರೂ ತಂತಮ್ಮ ಸಂಗಾತಿಗೆ ವಿಚ್ಛೇದನ ನೀಡದೇ ಲಿವ್ ಇನ್ನಲ್ಲಿ ನೆಲೆಸಿದ್ದಾರೆ. ಇಬ್ಬರ ವಿಚ್ಛೇದನ ಅರ್ಜಿಗಳೂ ಇತ್ಯರ್ಥಕ್ಕೆ ಬಾಕಿ ಇವೆ.
ವಿಚ್ಛೇದನದ ತೀರ್ಪು ಬರುವ ಮುನ್ನವೇ ಅನೇಕ ವರ್ಷಗಳಿಂದ ಒಟ್ಟಿಗೇ ಇದ್ದುದೂ ಅಲ್ಲದೇ ದೌರ್ಜನ್ಯದ ಕೇಸ್ ದಾಖಲು ಮಾಡಿ ಕೋರ್ಟ್ ಸಮಯವನ್ನು ವ್ಯರ್ಥ ಮಾಡಿದುದಕ್ಕೆ ಪಂಜಾಬ್-ಹರಿಯಾಣ ಹೈಕೋರ್ಟ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. ದೌರ್ಜನ್ಯಕ್ಕೆ ಸಂಬಂಧಿಸಿದಂತೆ ಯಾವುದೇ ದಾಖಲೆಗಳನ್ನು ನೀಡದೇ ಸುಖಾಸುಮ್ಮನೆ ಕೋರ್ಟ್ ಸಮಯ ಹಾಳು ಮಾಡಿರುವುದು ನ್ಯಾಯಮೂರ್ತಿಗಳ ಸಿಟ್ಟಿಗೆ ಕಾರಣವಾಗಿದೆ.
ಹಣದುಬ್ಬರ ಇಳಿಕೆ: ಸುಬ್ರಮಣಿಯನ್ ವಿಶ್ವಾಸ
ಈ ಹಿನ್ನೆಲೆಯಲ್ಲಿ ಈ ಜೋಡಿಗೆ ಬುದ್ಧಿ ಕಲಿಸಲು ಮುಂದಾಗಿರುವ ನ್ಯಾಯಮೂರ್ತಿಗಳು 50 ಸಾವಿರ ರೂಪಾಯಿಗಳ ದಂಡ ವಿಧಿಸಿದ್ದಾರೆ. ಈ ದಂಡದ ಹಣವನ್ನು , ಕೋವಿಡ್ ಪರಿಹಾರ ನಿಧಿಗೆ ನೀಡುವಂತೆ ಆದೇಶಿಸಿದ್ದಾರೆ. (ಏಜೆನ್ಸೀಸ್)
