ಕರೊನಾ ಬಿಕ್ಕಟ್ಟು ಹಾಗೂ ಅದರ ನಂತರ ಉಂಟಾದ ಲಾಕ್ಡೌನ್ ಹಿನ್ನೆಲೆಯಲ್ಲಿ ಅವೆಷ್ಟೋ ವ್ಯವಹಾರಗಳು ನಿಂತು ಹೋಗಿವೆ. ಇದೇ ಕಾರಣಕ್ಕೆ ಬ್ಯಾಂಕ್ಗಳಿಂದ ತೆಗೆದುಕೊಂಡಿರುವ ವಿವಿಧ ಸಾಲಗಳ ಇಎಂಐ ಕಟ್ಟಲಾಗದೇ ತೊಂದರೆ ಅನುಭವಿಸುತ್ತಿದ್ದಾರೆ.
ಗೃಹ, ಶಿಕ್ಷಣ, ವಾಹನ ಅಥವಾ ವೈಯಕ್ತಿಕ ಸಾಲಗಳು ಈ ವ್ಯಾಪ್ತಿಗೆ ಬರುತ್ತವೆ. ಅಂಥವರು ಇನ್ನೆರಡು ವರ್ಷಗಳವರೆಗೆ ಇಎಂಐ ಕಟ್ಟಬೇಕಿಲ್ಲ. ಎರಡು ವರ್ಷಗಳ ನಂತರ ಇಎಂಐ ಮುಂದುವರೆಸಬೇಕು ಎಂದು ನಿನ್ನೆಯಷ್ಟೇ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಹೇಳಿದೆ.
ಆದರೆ ಸ್ಟೇಟ್ ಬ್ಯಾಂಕ್ ಈ ಕುರಿತು ಕೆಲವೊಂದು ಸ್ಪಷ್ಟನೆಗಳನ್ನು ನೀಡಿದೆ. ಯಾರೆಲ್ಲಾ ಈ ಯೋಜನೆಗೆ ಅರ್ಹರು ಎಂಬ ಬಗ್ಗೆ ಇನ್ನಷ್ಟು ಮಾಹಿತಿಗಳನ್ನು ಸ್ಪಷ್ಟಪಡಿಸಿದೆ.
ಬ್ಯಾಂಕ್ ಹೇಳಿರುವುದು ಹೀಗೆ:
* ಇದಾಗಲೇ ಹೇಳಿರುವಂತೆ ಇಐಎಂ ಎರಡು ವರ್ಷ ಮುಂದೂಡಿದ ಮಾತ್ರಕ್ಕೆ ಗ್ರಾಹಕರು ತುಂಬಬೇಕಿರುವ ಮೊತ್ತವು ಕಡಿಮೆಯಾಗುತ್ತದೆ ಎಂಬ ಅರ್ಥ ಕಲ್ಪಿಸಕೂಡದು. ಏಕೆಂದರೆ, ಈ ಸೌಲಭ್ಯದ ಪ್ರಯೋಜನ ಪಡೆದುಕೊಳ್ಳುವವರು ಎರಡು ವರ್ಷಗಳವರೆಗೆ ಕಂತನ್ನು ತುಂಬಬೇಕಿಲ್ಲ ಎನ್ನುವುದು ನಿಜವಾದರೂ, ಈ ಅವಧಿ ಮುಗಿದ ಮೇಲೆ ಶೇ. 0.35 ರಷ್ಟು ಹೆಚ್ಚಿನ ಬಡ್ಡಿಯನ್ನು ಪಾವತಿಸಬೇಕಾಗುತ್ತದೆ.
1) 24 ತಿಂಗಳ ಅವಧಿಯು ಗರಿಷ್ಠ ಅವಧಿಯಾಗಿದೆ. ಆದ್ದರಿಂದ ಆ ನಂತರ ಹೆಚ್ಚುವರಿ ಬಡ್ಡಿ ಕಟ್ಟಲು ಇಷ್ಟವಿಲ್ಲದ ಸಾಲಗಾರರು 1 ರಿಂದ 24 ತಿಂಗಳ ಮೊರಟೋರಿಯಂ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
2) ಈ ಯೋಜನೆಗೆ ಅರ್ಜಿ ಸಲ್ಲಿಸುವ ಸಮಯದಲ್ಲಿ ಸಾಲಗಾರರದ್ದು ‘ಪ್ರಮಾಣಿತ ಖಾತೆ’ ( ‘standard account’) ಆಗಿರಬೇಕು.
3) ಮಹತ್ವದ ವಿಷಯ ಎಂದರೆ, ಕರೊನಾ, ಲಾಕ್ಡೌನ್ ಸಮಯದಲ್ಲಿ ವೇತನ ಅಥವಾ ಆದಾಯವು ಕರೊನಾ ಅವಧಿಯಲ್ಲಿ ಪಡೆಯುತ್ತಿರುವ ವೇತನಕ್ಕಿಂತ ಕಡಿಮೆಯಾಗಿರಬೇಕು. ಅಂದರೆ 2020ರ ಫೆಬ್ರವರಿಗೆ ಹೋಲಿಸಿದರೆ 2020ರ ಆಗಸ್ಟ್ನ ವೇತನ ಅಥವಾ ಆದಾಯ ಕಡಿಮೆಯಾಗಿರಬೇಕು.
4) ಈ ಅವಧಿಯಲ್ಲಿ ಉದ್ಯೋಗ ಕಳೆದುಕೊಂಡಿರಬೇಕು ಇಲ್ಲವೇ ಉದ್ಯೋಗ/ವ್ಯಾಪಾರ ನಷ್ಟವಾಗಿ ಅದನ್ನು ಬಂದ್ ಮಾಡಿರಬೇಕು.
5) ಸ್ವಯಂ ಉದ್ಯೋಗಿಗಳು, ವೃತ್ತಿಪರರು/ಉದ್ಯಮಿಗಳು ಸಾಲ ಪಡೆದಿದ್ದರೆ, ಅವರ ಉದ್ಯಮ/ಘಟಕ/ ಅಂಗಡಿ/ ವ್ಯಾಪಾರ ಚಟುವಟಿಕೆ ಕರೊನಾ ಸಮಯದಲ್ಲಿ ಬಂದ್ ಆಗಿ ನಷ್ಟ ಅನುಭವಿಸಿರಬೇಕು ಇಲ್ಲವೇ ಶಾಶ್ವತವಾಗಿ ಅದನ್ನು ಬಂದ್ ಮಾಡಿರಬೇಕು.
6) 2020ರ ಮಾರ್ಚ್ 1ಕ್ಕಿಂತ ಮೊದಲು ಸಾಲ ಪಡೆದ ಹಾಗೂ ಕೋವಿಡ್-19 ಲಾಕ್ಡೌನ್ವರೆಗೆ ಸಾಲಮರುಪಾವತಿ ಕಂತನ್ನು ನಿಗದಿತ ಅವಧಿಯಲ್ಲಿ ಕಟ್ಟುತ್ತಾ ಬಂದಿರಬೇಕು.
ಅರ್ಜಿ ಸಲ್ಲಿಕೆ ಹೇಗೆ?
ಈ ಮೇಲಿನ ಷರತ್ತುಗಳು ನಿಮಗೆ ಅನ್ವಯ ಆಗುವುದೇ ಆಗಿದ್ದಲ್ಲಿ, ನೀವು ಎಸ್ಬಿಐ ಅಧಿಕೃತ ವೆಬ್ಸೈಟ್ಗೆ ಭೇಟಿ ನೀಡಿ ಅರ್ಜಿ ಸಲ್ಲಿಸಬಹುದು (ನಕಲಿ ವೆಬ್ಸೈಟ್ಗಳ ಬಗ್ಗೆ ಇರಲಿ ಎಚ್ಚರ). ನಿಮ್ಮ ಅಕೌಂಟ್ ಇರುವ ಬ್ಯಾಂಕ್ಗೆ ಖುದ್ದಾಗಿ ಹೋಗಿಯೂ ಅರ್ಜಿ ಸಲ್ಲಿಸುವ ಅವಕಾಶವಿದೆ.
ವೆಬ್ಸೈಟ್ ಓಪನ್ ಮಾಡಿದ ಸಂದರ್ಭದಲ್ಲಿ ನಿಮ್ಮ ವೈಯಕ್ತಿಕ ಕೆಲವೊಂದು ವಿವರಗಳನ್ನು ಕೇಳಲಾಗುತ್ತದೆ (ಖಾತೆ ಸಂಖ್ಯೆಗಳು ಮತ್ತು ಮೊಬೈಲ್ ಸಂಖ್ಯೆ ಇತ್ಯಾದಿ) ನಂತರ, ಒಟಿಪಿ ಮೂಲಕ ಅರ್ಜಿಯನ್ನು ಮಾನ್ಯ ಮಾಡಲಾಗುತ್ತದೆ. ಅಲ್ಲಿ ಕೆಲವೊಂದು ಪ್ರಶ್ನೆಗಳನ್ನು ಕೇಳಲಾಗುತ್ತದೆ. ಆಗ ನೀವು ಈ ಯೋಜನೆಗೆ ಅರ್ಹರೇ ಎಂಬುದನ್ನು ತಿಳಿಯಲು ಒಂದು ಉಲ್ಲೇಖ ಸಂಖ್ಯೆ (reference number) ನೀಡಲಾಗುತ್ತದೆ. ಈ ಸಂಖ್ಯೆ 30 ದಿನಗಳ ಕಾಲ ಮಾನ್ಯವಾಗಿರುತ್ತದೆ. ಉಳಿದ ವಿಷಯಗಳು ಅಲ್ಲಿಯೇ ಉಲ್ಲೇಖಗೊಂಡಿವೆ.
ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವ ಮುನ್ನ ಇವುಗಳನ್ನು ರೆಡಿ ಇಟ್ಟುಕೊಳ್ಳಿ
1) 2020ರ ಫೆಬ್ರವರಿ ತಿಂಗಳ ಮತ್ತು ಕೊನೆಯ/ ಅರ್ಜಿ ಸಲ್ಲಿಸುವ ತಿಂಗಳ ವೇತನ ಸ್ಲಿಪ್.
2) ಕೆಲಸದಿಂದ ವಜಾಗೊಂಡಿದ್ದರೆ, ಬಿಡುಗಡೆ ಪತ್ರ
3) ಫೆಬ್ರುವರಿ ತಿಂಗಳಿನಿಂದ ನೀವು ಈ ಅರ್ಜಿ ಸಲ್ಲಿಸುವ 15 ದಿನಗಳ ಮುಂಚೆ ಮಾಡಿರುವ ಅಕೌಂಟ್ ಸ್ಟೇಟ್ಮೆಂಟ್ಗಳು
4) ತಮ್ಮ ವ್ಯಾಪಾರದ ಮೇಲೆ ಕರೊನಾ, ಲಾಕ್ಡೌನ್ ಪರಿಣಾಮ ಬೀರಿದೆ ಎಂದು ಹೇಳುವ ಡಿಕ್ಲರೇಷನ್.